10 - EUN' HISTOERE ED CACHE

Adon, quand j’étos jonne clerc à Gennes-Ivergny, souvin, l’diminch’, j’allos al cache avec ech maire, Michel Bocquet, min voésin Daniel Dilly et min comarate, Michel Cossin. Eux, y cachottent et mi ech portos ch’ carnier.
In diminch’ matin, à côté d’ech’ bos d’ech’ Béquinval, Michel Cossin y avot tué eun’ tiote perdrix (du moins y l’ pinsot et mi aussi) que j’avos mis din ch’ carnier. Vers eun’ dizan’ d’heures, comme y faisot caud, tous les quat’ on s’est assis à l’ombe d’eune hayure pour arprind es n’halanne , casser in’ tiote croûte et boire in canon d’ pinard.
Ché cacheux y avottent posé leus fusils à côté d’eux din ch’ l’herbe et mi, min carnier. On discutot trinquilmin in mingeant sin cantiau rimpli d’pâté d’lieve tout in croquant in cornichon, eun’ échalote ou eun’ têt’ d’alle. Ch’ tien d’Michel Cossin, un grand dadais d’griffon sec com’ un ral’, y allot d’ l’un à l’aut’ pour archevoir un morchiau qu’i l’avaloé d’eune seule gueulée. I devot avoir, ch’tien lo, ché t’à croire, des boïaux comme des manches ed quémiche.
Tout d’in co, v’lo ti pas que l’oujeau qu’on croyot mort qui dessaque d’ech carnier et qui met à courir in clopinant ed’vant nous. Voïant cho, Michel Cossin, y tin s’man qui tient sin cantiau d’pain in direction d’el perdrix in criant « bé, bé, bé…arbeïe, arbeïe !!! al perdrix a s’arsauffe !!… » Ech sécral ed griffon, qui crot qu’ sin maît’ y veut y donner sin pain, y gueule ech morchiau vite fait ben fait in rinverchant avec es patte ech’ verre d’pinard qui étot posé à côté à terre.
Ch’ qui fait qu’in moins d’temps qui n’faut pour el dire, min Cossin y n’avot pu ni perdrix, ni casse-croûte, ni pinard.

Georges RATEL
Croisilles