Dins les années 90, j’avos créé in club ed ping-pong à Gennes-Ivergny. In samedi après-midi, Gérard Fleury, Marc Demoncheaux et pis mi, in rincontrot eune équipe ed Saint-Pô, Jean Domé, Vaast dit « ch’mitron » et Noël Théret.
In gagnot 5 à 4. Marc Demoncheaux y jouot sin dernier match contre Noël Théret. Si Marc y gagnot, ch’étot la victoire pour nous autes (6 à 4). Si y perdot, St Pol arrachot el match nul (5 à 5). Marc y gagne el premier set mais y perd ech deuxième. A la belle, Théret y mène 19 à 3. Ches sets s’ jouant in 21 points, ch’étot mal parti pour nous autes….. Mais Marc y bot comme in tchien, y égalise à 19 et y gagne 21-19. Théret y n’arvenot point.
El lind’man, i fait sin tiercé : 6 – 4 (el résultat d’ech match) pis el 3 (les tros points ed Marc) ; Y n’o point pu juer el 19 : y n’avot qu’18 qu’vaux au départ.
Eh ben, vos crorez si vos voulez mais Théret y o gagné ch’ tiercé dins l’ désorde et y o mis pus tros mille francs dins s’ poche.
Si vos volez êtes riches in jour, juez au tiercé…. Mais itou au ping-pong !
Photo : De gauche à droite, au premier rang : Marc Demoncheaux, Gérard Fleury, Bernard Lagache, Jean Lagache. Au deuxième rang : Michel Cossin, Maurice Février et Georges Ratel.
Aucun commentaire:
Enregistrer un commentaire