I n’y o pos si longtin, ches timpes y étotent oblitérés aveuque eune flamme postale. Y avot ch’ cachet à date et, à côté, dins in rectingl’, qués rinseig’mints sus l’ville d’u qu’el’ lette al étot partie. Ch’ étot bié instructif. Mi, j’in faisos collection. In y apprenot qu’à Arras, y a deux belles plaches, qu’ Jean d' La Fontaine y est né à Catiau-Thierry, qu’à Caudry, in faisot d’el dintell’, que Fénelon i a vécu à Cambrai, qu’à Somain, y o eune gare ed triage, qu’Boulogne y est ch’ premier port ed pèque ed France ….
Acht’ heur, in n’sait même pu dé où qu’el lett’ el vié. Ché tout simplemint marqué, d’sus l’inv’lop’, qui t’arrive dé foé troés jours après avoir été j’té dins l’ boête aux lettes, « La Poste – Lettre prioritaire et pis l’date ». Tout juste pour qu’ té puisses vérifier ch’ dicton qui dit : « Kronembourg à la poste, Chronopost à la bourre »
