5 - QUIND IN ALLOT GLAINER

In août, quind j'étos gosse, y fallot aller glainer (1), ramasser ché épis laichés par terre par el' fauqueuse-lieuse ed' ché cinsiers. J'y allos aveuque em' soeur Odile, ed' neuf heures à midi et pis deux heures à six heures. Ch'étot poent trop marrant mais in m' demindot poent m' n'avis. In parcourot tout ch' camp d'un bout à l'aute, ramassant in épi par chi, in épi par lo, sins passer tout près d'ché cahoux (2) pour poent êtes tinté (3) ed tirer à ché bottes (4). Où qu'on in ramassot l' plus, ch'étot dins ch' détourage, in binde (5) ed' deux mètes ed' largue qu'ech cinsier y avot fauqué al fauque (6) pour poent qu' ses qu'vaux (7) in' piétainent poent el' récolte.
Souvint, j' m'arrêtos pour arposer (8) min dos. Em' soeur am' disot : " T'as bintôt fini ed raviser (9) ché alouettes picher (10) ? T'à l'heure, ech tien blanc y va monter sus tin dos !" Et j' m'armettos au boulot.
Quind y faisot caud (11), cho qu' j'avos querre (12), ch' étot el' bonne goulée d'iau (13) rallongée ed' café, qu' in buvot al boutelle intourée dins in torchon humide, qu'in gardot à l'ombe dins in cahou.
In septimbre, m'in père y battot el' récolte au flayer (14), sus in bâche, dins l' cour. Ech' grain y servot, pindint l'hiver, à nourrir ches glaines (15), ches canards ed' barbarie, ches pourdaines (16) et pis ch' codin (17). Aveuque el' palle, em' mère al raffourot (18) ches lapins.

Georges RATEL
Croisilles

1- Glainer = glaner. 2- Cahou = petite meule de 5 ou 6 gerbes. 3- Tinter = tenter. 4- Botte = gerbe. 5- Binde = bande. 6- Fauque = faulx. 7- Qu'vau = cheval. 8- S'arposer = se reposer. 9- Raviser = regarder. 10- Picher = uriner. 11- Caud = chaud. 12- Avoir querre = aimer. 13- Iau = eau. 14- Flayer = fléau. 15- Glaine : poule. 16- Pourdaine = dinde. 17- Codin = dindon. 18- Raffourer : donner du fourrage.