7 - EL VISITE ED L'INSPECTEUR

Un momint dé s' carrière qu'un clerc i n' peut poent oublier, ché l' visite ed l'inspecteur qui s' pointot souvint el lundi matin, alors qu' ech' clerc i étot incor din les vâpes (1) pour s'ête couqué(2) tard el veille.
I tapot al porte, i inl'vot sin capiau (3) et s'asseyot din l' fond d'el classe, à côté d'ech fu à carbon (4).
Bié sûr, i v'not jamais quand ech' clerc i racontôt, à ses élèves avec leus bouques (5) overtes, l'histoire des Gauloais qui coupettent du gui sus ché quênes (6) aveuque leus cherpes (7) in or ou chelle d'Attila et d' ché Huns qui mettètent leu viande sous leus selles pour l'attindrir avint d'el minger crue. Nin, i v'not toudis quind ché p'tiots y faisettent, in tirant leus langues, eune page d'écriture avec leu porte-pleume, et qu'ché moïens i faisettent un exercice ed vocabulaire à tros (8), et qu ech' clerc y s'esquintot (9) à expliquer à ché grands commint on fait eun' division à tros chiffes.
A ch' tableau, aveuque es craie dins s' man, " I o tros chiffes à ch' disiseur, ech prins tros chiffes à ch' dividente...." disot ch' mait' à ché galupiots qui n' faisotent qu'à s'artourner (10) pour raviser (11) ech' biau môssieu assis, derrière eux, sus s' cayelle (12). I s' imbrouillot forchémint (13) in sintant, din sin dos, les yus(14) d'ech l'inspecteur. Ché tout juste si n' criot poent in lévant ses bros (15) : "Eun tirez poent, j'ém rinds...."
Dès foais, ech' l'inspecteur y s' lévot, y v'not à ch' tableau, et in deux coups d'ed' cuiller à pot, i expliquot commint i fallot faire. Ché gosses i n'comprénottent rin ! Ech' clerc non pu, mais i balanchot s' tête, din haut in bos, d'in air intindu. Forchémint, quin ech' lion i rugit, ché singes i ferment leus becs !
Contint d' li, ech' l'inspecteur i félicitot ech clerc pour ses bons résultats, i armettot sin capiau et pis i s'in allot. La vie al povot arprinde sin train-train.
Eune quinzane ed jours après, ech' facteur i apportot ch' rapport. Contint ed' vir que s'note al avot monté comme d'habitude d'in d'mi point, aveuque es pu belle pleume, ech' clerc i arcopiot el bafouille sur sin " Cahier de rapports". I étot alors trinquille pindint troais ou quatr' ans.

Georges RATEL
Croisilles (62128)

(1) Les vâpes = les vapeurs. (2) Couquer = coucher. (3) In capiau = un chapeau. (4) Un fu à carbon = un feu à charbon. (5) Eune bouque = une bouche. (6) In quêne = un chêne. (7) Eune cherpe = une serpe. (8) In tro = un trou. (9) S'esquinter = se fatiguer. (10) S'artourner = se retourner. (11) Raviser = regarder. (12) Eune cayelle = une chaise. (13) Forchémint = forcément. (14) Les yus = les yeux. (15) Un bros = un bras