6 - ECH FLOT D'EL PLACHE

Din l' temps, à Beun'ville (1), à côté d'el plache (2), y avot un flo (3). A ch' t' heur, y est arbouché (4) et eun' mason y est même bâtie d'sus. Ch' étot lo qu' ché cinsiers y faisotent boire leu qu'vaux in arvénant ed' ché camps. In s'y est bin amusé, à ch'flo ! In juin, in y attrapot des salamandes (5) toutes noires aveuque leurs vint's(6) rouches, des tritons noirs et gones, des tétards qu'in nourrissot din in pot d' confiture aveuque eun' fenne (7) trinche ed' peumes ed' terre et qu'in veyot grossir et quanger pour d'vénir des garnoulles (8).
Din l' temps, l'hiver ch'étot l'hiver ! Ch'étot poent rare d'avoir eun' quarantaine ed' chintimètes ed' neige et eun' glache ed' dix chintimètes d'sus flo où l'in faisot des glichades. In ch' lanchot d' ech' l'hayure (9) ed' Marie d'ech' flo et in glichot jusqu'à ch' mur in bordure d'el' route, tintôt d' bout, tintôt à crou-crou, tintôt sus in pied, tintôt sus l'aute.
Pour bin glicher, y fallot avoir des fers sous ses galoches (10). Souvint, mi, j'avos des daches (11) et j'em' faisot armonter mes bartelles (11) quand qu' min père y voyot qu'y m'in manquôt.
A côté d'ech" flo, y avot des grinds arbes, des chycomores (13). In y attrapot, in d' sous d' ché feulles, des hourlons (14) qu'on faisot voler au bout d'un fil à coud' attaqué à leu queue. Des foes, à l'école, in ouvrant ech' couvercle perché d' tros d' el' boete à chirache (15) où l'in avot infermé ché hourlons, in in laichot sauver un qui s'involot in bourdonnant pour s' taper d'in l' farnette (16). Alors, à chaque fos, M. Monteuis, ech' clerc (17), y confisquot el' boete.
Aujourd'hui, aveuque el' pollution, ché produits ed' trait'mint et la couche d'ozone qui s' déquire (18), ché gosses y peuvent pu connaît' ché p'tiots plaisis ed' not' jeunesse.

Georges RATEL
Croisilles

1-Beun'ville = Buneville (village près de St Pol sur Ternoise) . 2-Plache = place. 3-Flo = mare. 4-Arboucher = boucher. 5-Salamande = salamandre. 6- Vint' = ventre. 7-Fenne = fine. 8-Garnoulle = grenouille. 9-Hayure = haie. 10- Galoche = chaussure à semelle de bois. 11-Dache = clou à grosse tête.12- Bartelles = bretelles. 13-Chycomore = érable sycomore. 14-Hourlon = hanneton. 15-Chirache = cirage. 16-Farnette = fenêtre. 17-Clerc = instituteur-secrétaire de mairie. 18-Déquirer =déchirer