4 - A MON D'EM GRIND-MERE

Quand j’étos p’tiot, ech restos à Beun’ville(1), près d’ Saint Po. Em’ grind-mère maternelle, Maman Lucie, al habitot à Pierremont, à ch’Croc, pas loin d’ech molin, à eune quinzanne ed’ kilomètes. Pindin chez vacances, in allo l’vir. In y allo à pied ben sûr. In couchot là-bo et in arv’not ed l’lendeman.
A Pierremont, tous les soirs, in mingeo d’el soupe. Tintôt, ch’étot d’el barzille, d’el soupe au lait aveuque du pan rassis (din l’temps, y n’y avot pas d’gaspillache !) aveuque des oeufs cassés d’dins, tintôt ch’étot du guinze, d’el soupe faite avec du lait battu, du baburre, que Maman Lucie a récupérot quand al faisot ch’ burre. Cho, j’ n’avos pas trop querre(2), j’avos du mau à l’avaler : ch’étot sûr comme la rache(3).
Après avoir mingé, souvint, j’ fesos une partie ed’ domino aveuque em’ grind-mère, pendin qu’ min grind’père, Papa Paul, avec ses grandes moustaches, y fumot s’pipe in terre à côté d’ech’ fu.
Mi, j’dormos din ch’ fournil(4). J’vos cor’ ech’ lit aveuque es’ grosse paillasse rimplie d’paillettes d’avone(5) et sin gros édredon ed’ duvet d’oujons(6). J’ n’ dormos pas trop rassuré din ch’ lit lo. A côté, ahoquée(7) ach’ mur, y avo eune grinde trinchonnoire(8) avec ses longues dints. J’avos toudis peur que, pindint que j’dormos, al dégringole sur mi et pis qu’em’ cope in deux.

Georges RATEL
Croisilles

1- Beun’ville = Buneville
2- Avoir querre = aimer
3- Rache = rage
4- Fournil = pièce où se trouvait le four à pain
5- Paillettes d’avone = balle d’avoine
6- Oujon = oie
7- Ahoquer = accrocher
8- Trinchonnoire = scie passe-partout