18 - ECH KEPI D'ECH GINDARM'

A ch’t heur’, chés gindarm’ y n’ont pu eune minute à eusses. I s’ muchent derrière chés hayures aveuque leus leunettes pour raviser si té n’reules pas trop vite ; i t’font souffler dins ch’ ballon pour vir’ si t’n’auros point bu in verre ed trop ; i t’attindent derrière chés fus rouches pour t’coincher si té passes à l’oranche…..

Dins l’ temps, y prénettent el temps d’vivre. Y s’allottent à vélo d’in bout à l’aut’ d’ech canton, toudis par deux comme chés témoins ed Jéhovah, faisant un procès à ch’ti lo qui laissot couler sin roussi dins ch’ fossé ou bié à ch’ti lo qui laissot corir sin t’chien dins chés rues. El pu souvint, y étottent dins ché bistrots à chucher eune bonne bistouille.

Eune fos, y étottent v’nus à la mairie pour avoir des rinseign’mints pour leus fichiers d’état civil. Ech’ l’ouvrach’ fait, y sont v’nus al’ mason boire l’apéro. Tout d’in cop, in sint comme eune odeur ed célluloïd qui breule. L’in d’chés gindarm’s y avot posé sin képi sus ch’ fu qui brûlot au ralenti. Y l’ prind in vitesse et l’passe sous l’ieau d’ech robinet. Pour y r’donner eune forme, on a rimplaché es celluloïd’ qui avot fondu par eune binde ed carton. Comme cho, ech gindarm’ y a pu traverser ch’ canton et rintrer al gindarm’rie avec in képi qui arsemblot plus à in képi qu’à l’ casquette ed Doc Ginéco. !

17 - PETIT LUKAS

Tu auras bientôt quatre ans.
Tu croques la vie à pleines dents.
Sages, les hommes ne sont pas.
Prends garde à toi, petit Lukas !

La couche d’ozone se déchire.
Est pollué, l’air que tu respires.
Sages, les hommes ne sont pas.
Prends garde à toi, petit Lukas !

Les poubelles regorgent de déchets.
Les usines multiplient les rejets.
Sages, les hommes ne sont pas.
Prends garde à toi, petit Lukas !Les hannetons ont disparu.
L’alouette ne chante plus.
Sages, les hommes ne sont pas.
Prends garde à toi, petit Lukas !

Quand, pour moi, le glas aura sonné.
Quand tu vivras ton trentième été.
Sages, peut-être, les hommes seront .
Petit Lukas, fais attention !

16 - CHES VACCINATIONS

« Lundi prochain, vous allez être vaccinés. Vous apporterez un flacon d’urine. » . Cho qu’ech clerc y n’avot point dit lo ! Pour mi, ch’étot la catastroph’. Je n’mingeos pu. Ech n’in dormos pu ou ben j’rêvos toudis qu’un gros méd’cin in blouse blanque y courot après mi avec eune grosse s’ringue sous sin bros.
Ech jour fatidique arrivé, y fallot m’ traîner à l’école comme on traîne in viau à l’abattoir. Dins l’classe, in aurot intindu eune mouque voler ! Tout d’in co, in tape al porte. Ech docteur Colau, in grand gaillard, y rinte, y pose es grosse sacoche ed cuir sus bureau et y in sort sin réchaud à alccol, ses fioles ed vaccin et s’boëte à s’ringues.
Chés pu p’tits y passotent chés premiers et y criotent comme des cochons qu’in égorgent. Chés pu grands y étoent blancs comme des linchus. Min tour y arrive. Ech doncteur y passe es n’aigulle aussi pointue qu’in piquet à vaques dins l’flamme d’ech réchaud, y m’ coinche intre ses g’noux, y frotte em’n’épaule avec in coton imbibé d’éther et plante es n’aigule. In nouviau coup d’éther et ouf ! ch’ étot fini ! Trinquille pour quéqu‘s années !
Eune fos, ech’ tiot Hinri qui restôt dins eune cinse à coté d’ech l’église, y so arsauvé à s’ mason, y so camoufflé derrière eune tôle appoyée sus ch’ mur d’eune étave. In a caché tout l’après-midi après li ; in l’a jamais artrové. Y n’est sorti d’es muche qu’au soir quand l’école al a été finie. J’eun’ parle point d’ech l’ingueulade qui l’o prind !

15 - IN N'A PU L' DROT D' FEUMER !

A cht’heure, in n’a pu l' drot feumer dins chez lieux publics, mêm’ dins chez bistrots… Si min père y s’rot incor’ lo, j’em’ demind’ cho qui in euro pinsé, li qu’ j'ai toudis connu avec es cigarette à s'bouque, à tel point qu’ ses dogts y étoent tout gônes ed’ nicotine.
Y faut dire qui n’ feumot point du toubac ed ‘gonzesses ! Ch’ étot du toubac in feuilles qui cultivot li mêm’ dins ch’gardin. Tous les ans, y in plantot une trentain’ ed pieds, camouflés derrière chés topinambours ou chés haricots à rames. In juillet, y faisot s’ récolte. Y infilot chés feuilles sur eun’ fichelle avec eun’ aigule qui l'avot faite avec eun’ baleine ed’ parapluie et y les faisot séquer dins ch’garnier, avant de les loïer in manottes qu’y ringeot, in lit d’toubac, in lit ed paille ed’ soile, dins eun’ vieille maie.
Tous les soirs, après avoir mingé, y copot, sur in bloc ed’bos, sin gros cigare ed’ toubac pour el’ lend’main avec un coutiau ragugé comm’ in rasoir. Quand y avot un mont à peu près gros comme sin poing, y l’ mettot dins s’ blague, eun' vessie d’ cochon qu’y l'avot fait séquer dins ch’ fournil, à côté d’ el’ quéminée d’ fu d’bos.
Min père y avot quère, les longues soirées d’été, d’ feumer es cigarette, assis sus ch’ querpion, avec sin tchien à côté d’li

14 - LA CHUTE DES FEUILLES

C’est l’automne,
C’est la chute des feuilles
C’est ainsi, on n’y peut rien.
Celle-là,
J’aurais voulu pourtant
Qu’elle reste là-bas,
Au loin.
Mais ce matin,
Elle était là.
Je l’ai prise
Dans mes mains tremblantes.
Je l’ai déposée sur la table.
Je l’ai étalée
Du dos de la main.
Mais mon coeur soudain s’est serré,
Mes yeux se sont écarquillés,
Ce n’est pas vrai !
C’est encore augmenté !!
Mais, c’est l’automne
On n’y peut rien
Ma feuille d’impôt,
Inexorablement,
Est tombée.

Georges RATEL

Croisilles (62128)

13 - ECH' TIOT ROBIN ET CHES POUBELLEUX (Histoire vraie)

Ech tiot Robin, tros ans, y est v’nu passer eune semane chez sin grand-père Jean-Marie et pis grand-mère Geneviève à la mer, à Merlimont. Il est six heures du matin. Chés viux y sont incor’ dins les bros d’ Morphée. Ech tiot Robin y intind du potin dins chés rues. Y s’ saque ed s’in lit et y vos d’sus balcon vir quoé qui s’passe. : Ché ché poubelleux qui font leu tournée ed ramassache ed chés ordures ménagères.
Robin y leu crie : « Bonjour messieurs ! ». In voïant ch’ tiot in haut d’ech balcon, in des poubelleux y dit. « Té lo, min tiot, cha vo ?
Robin y vo rinveiller sin grand’père et y demande : « Pourquoi, le monsieur il m’a dit : Té lo, min tiot, cha vo ? ». Pris in peu d’court, grand-père Jean-Marie y n’sait point quoé dire et y répond : « Eh bin….Eh bin…. Ché passe qu’y ramasse ché poubelles…. ».
In momint après, in cousin ed Robin y arrive ed Bétheune. Y dit bonjour à tout l’monde et, in passant s’ man sur l’tiête ed Robin, y dit : « Té lo, min tiot, cha vo ? ». Alors Robin y arcul’ d’eine ingambée et y d’mande : « Alors, ti aussi té ramasses chés poubelles ? ».

Georges RATEL
Croisilles (62128)

12 - CHE VACANCES A MERLIMONT

Té veux passer des bonnes vacances sur la Côte d’Opale ? Té vos à Merlimont-Plage. Lo, té peux faire el lézard sus l’ sab’, t’es peux laver tes pieds : el ïau al est bonne. Té peux ramasser des moules et pis d’zénons. Sinon, té peus cor d’assir al terrass’ du Bar d’el plage et, in chuchant eun’ bonne mousse, arbeïer ché fèmes qui papottent, ché jonnes files qui bronzent au solel ou ben ché galupiots qui barbottent din ché bâches in riant telmint y sont contints.
Mais té peux aussi aller arbeïer ché jueux ed boules ed bos. Té n’peux poen les louper, y sont à côté d’eun’ grande pancarte bleue où ché t’écrit : «AMICALE DES ESTIVANTS DE MERLIMONT-PLAGE, ouvert à tartous. Rinseign’mins ichi ». Té peux même juer avec eusses. Té s’ros toudis ben archu. T’as poen d’boules ed bos ? T’imbêtes point, y vont t’in prêter. Avec eux zautes, té vos find’ et’ pipe. Din l’bind’ lo, y n’o qui sont pas tristes.
Y o des foais, y jutent al pétanque à côté d’el plache d’ech marqué. Lo itou, té peux juer avec eusses. Té point fort ? Té s’ro toudis aussi fort que chti lo qui juot es première boule et pis qui avot cor ech cochonnet din s’ man. Té porros même arv’nir à t’n’appart (ché comme cho qu’on dit acht’heure) avec un tiot lot. Cha fro plaisi à t’fème qui s’ro aussi continte é pas toudis t’avoir din ses gambes.
T’as querre taper l’carton ? Les lundis, mercredis et vendredis, té porros faire ché concours ed belote. Attention, si té triches, ché amicalistes y vont raviser d’un sal’ oeil car y n’ont point querre chez tricheux !

Georges RATEL
CROISILLES (62128)

11 - IN JUE AU TRUCMUCH'

A Crogilles, comme pertout, in jue au Trucmuch’. Et in intind d’ché réflexions !
Ech méthodiqu’ y dit : « Mi, pour trover ché tros dessins qui sont camoflés, j’comminch’ d’in ch’ coin in haut à gauch’, et pis j’ ravise ed gauche à drote comme si qu’ech’ lisot. »
In aut’ y ajout’ : « Mi, ch’ fais à peu près parel à part qu’ech ravise d’in haut in bos comme y font chez chinos qu’in t’y lisent. »
V’lo cor cho qu’on peut intind :
Ech vantard : « Bo, ch’est point dur ! Mi, j’ai trouvé avant d’avoir ouvert el’ gazette. »
Ech défaitist’ : « Ché po cor el fos chi qu’es vos gagner ! Aujourd’hui, j’ai trové deux dessins et n’arrive point à trover ech’trozième. »
Ech râleux : « Cha y est, y z’ont mis deux dessins. Y z’ont oublié d’mett’ ech trozième ! Ech vos leur écrire, mi, à la Vos d’ech’ Nord ! »
Ech grand-père : « Qui ché qui a cor prind mes leunettes ? Ech vos point clair pour faire ech trucmuch’ »
Ech tiot qui rinte ed l’écol’ : « Où qu’al est l’gazette ? et pis , ne m’ dites rin, j’ vos trover tout seu. ».
Ech feignant qui fait même décoper l’vignette par s’fème : « Dis, min comarate, qué numéros qu’ t’as trovés aujourd’hui ? »
Ech’ tchien qui est couché comme un grand viau d’ sous l’table, sin musiau sur ses pattes (y n’parle point, mais y pinse si fort qu’on l’intind) : « Y ont t’y bentôt fini avec leu trucmuch’. Mi, j’ai fam. Y vont-y bétôt rimplir m' gamel’ ? »

Georges RATEL
CROISILLES (62128)

10 - EUN' HISTOERE ED CACHE

Adon, quand j’étos jonne clerc à Gennes-Ivergny, souvin, l’diminch’, j’allos al cache avec ech maire, Michel Bocquet, min voésin Daniel Dilly et min comarate, Michel Cossin. Eux, y cachottent et mi ech portos ch’ carnier.
In diminch’ matin, à côté d’ech’ bos d’ech’ Béquinval, Michel Cossin y avot tué eun’ tiote perdrix (du moins y l’ pinsot et mi aussi) que j’avos mis din ch’ carnier. Vers eun’ dizan’ d’heures, comme y faisot caud, tous les quat’ on s’est assis à l’ombe d’eune hayure pour arprind es n’halanne , casser in’ tiote croûte et boire in canon d’ pinard.
Ché cacheux y avottent posé leus fusils à côté d’eux din ch’ l’herbe et mi, min carnier. On discutot trinquilmin in mingeant sin cantiau rimpli d’pâté d’lieve tout in croquant in cornichon, eun’ échalote ou eun’ têt’ d’alle. Ch’ tien d’Michel Cossin, un grand dadais d’griffon sec com’ un ral’, y allot d’ l’un à l’aut’ pour archevoir un morchiau qu’i l’avaloé d’eune seule gueulée. I devot avoir, ch’tien lo, ché t’à croire, des boïaux comme des manches ed quémiche.
Tout d’in co, v’lo ti pas que l’oujeau qu’on croyot mort qui dessaque d’ech carnier et qui met à courir in clopinant ed’vant nous. Voïant cho, Michel Cossin, y tin s’man qui tient sin cantiau d’pain in direction d’el perdrix in criant « bé, bé, bé…arbeïe, arbeïe !!! al perdrix a s’arsauffe !!… » Ech sécral ed griffon, qui crot qu’ sin maît’ y veut y donner sin pain, y gueule ech morchiau vite fait ben fait in rinverchant avec es patte ech’ verre d’pinard qui étot posé à côté à terre.
Ch’ qui fait qu’in moins d’temps qui n’faut pour el dire, min Cossin y n’avot pu ni perdrix, ni casse-croûte, ni pinard.

Georges RATEL
Croisilles

9 - DINS MIN GARDIN

Au printemps, ech sus bien din min gardin, avec min t’chien
Quand, pour el première fos d’ l’année, j’arsors mes outils
Quand ech croque, à belles dints, dins ché premiers radis
Dins min gardin, ech sus contint.

In été, ech sus bien din min gardin, avec min t’chien
Quand ech sus assis su ch’ banc à l’ombe ed min peumier(1)
Quand j’ravise(2) ech’ mouviar(3) pluquer(4) dins mes fraisiers

Dins min gardin, ech sus contint

In automne, ech sus bien din min gardin, avec min t’chien
Quand j’ramasse mes manottes(5) d’échalotes
Quand ech récolte des cageots d’belles carottes
Dins min gardin, ech sus contint.

In hiver, ech sus bien din min gardin, (mais sans min t’chien)
Quand el neige al brille ed sous un blanc solel
Quand même ech frod y pique à mes orelles
Dins min gardin, ech sus contint.


Georges RATEL
Croisilles (62128)


1- Peumier = pommier
2- Raviser = regarder
3- Mouviar = merle
4- Pluquer = fouiller
5- Manotte = poignée